మానసబోధ 1 -5

మానసబోధ 1 -5

1. సంసార కూపమున 

   దిక్కుతోచక యుండి 

  విలపించు టేలకో మనసా 

         గురు పాదముల బట్టి 

         తత్త్వంబు తెలిసికొని 

        తప్పించుకో ఓయి మనసా 

2. ఎన్ని జన్మలనుండి 

    బంధంబు తొలగక 

   దుఃఖించుచున్నావు మనసా 

         నరజన్మ మందున 

         జ్ఞానంబు ఆర్జించి 

        తాపంబు బాపుకో మనసా 

3. సంసార మందలి 

   అల్ప సుఖమును జూచి 

   మురిసిపోవగనేల మనసా 

           ఆనందముగ తోచు 

          విషయభోగము లన్ని 

         ముణ్ణాళ్ళ ముచ్చటే మనసా 

4. దారుణం బైనట్టి 

   సంసార వ్యాధిని 

   పోగొట్టుకో ఓయి మనసా 

         పుట్టి చచ్చుట యందు 

        పురుషార్థ మేమియో 

        బాగుగా యోచించు మనసా 

5. రామ రామా యనుచు 

   నిరతంబు మదిలోన 

   స్మరణ చేయుము ఓయి మనసా 

          పరమ పావనమైన 

          దైవనామము చేత 

          పాపమంతయు తొలగు మనసా