వర్ణ సమామ్నాయము-తెలుగు వ్యాకరణం
ఆంధ్రభాషకు వర్ణములు 56. అందులో అచ్చులు: 16. ఇవి ఇతర వర్ణ సహాయములేక ఉచ్చరించబడును.
అఆ ఇఈ ఉఊ ఋౠ ఌౡ ఏఏఐ ఒఓఔ వీనికి స్వరములని, ప్రాణములని మారు పేర్లు.
హలులు: 37. కఖగఘఙ చౘఛజౙఝఞ టఠడఢణ తథదధన పఫబభమ యరఱలవ శషసహళ.
ఇవి అచ్చుల సహాయము చేత ఉచ్చరింపబడును. వీనిని వ్యంజనములు అని కూడ అందురు.
ఉభయాక్షరములు: 3. ఁ,ం,ః ఇవి అచ్చుల యొక్క, హల్లుల యొక్క ధర్మములు కలవి.కనుక వీటిని ఉభయాక్షరములు అందురు.
అంతస్థములు: య,ర,ల,వ అనునవి.
ఊష్మములు: శ,ష,స,హ, అనునవి.
పరుషములు: క, చ, ట, త, ప అనునవి. ఇవి కఠినముగా పలుకబడును. కావున వీనికి పరుషములని పేరు.
సరళములు: గ,జ,డ,ద,బ అనునవి. ఇవి తేలికగా పలుకబడును. కావున వీరికి సరళములని పేరు.
అనునాసికములు: ఙ,ఞ,ణ,న,మ అనునవి. ఇవి ముక్కు సహాయంతో పలుకబడును. కావున వీనికి అనునాసికములని పేరు.
వర్గాక్షరములు: 'క'కారము మొదలు 'మ'కారము వరకుగల హల్లులను వర్గాక్షరములందురు. ఇవి ఐదు వర్గములు.
1. క వర్గము : కఖగఘఙ
2. చ వర్గము : చచజఝఞ
3. ట వర్గము : టఠడఢణ
4. త వర్గము : తథదధన
5. ప వర్గము : పఫబభమ
వర్గయుక్కులు: వర్గయుక్కులనగా ఐదు వర్గములలోని ద్వితీయ, చతుర్దాక్షరములు. ఖ,ఛ,ఠ,థ,ఫ,ఘ,ఝ,ఢ,ధ,భ అనునవి.
No comments:
Post a Comment