అన్నమాచార్య కీర్తన - తానె తానే యిందరి గురుడు....
తానె తానే యిందరి గురుడు /
సానబెట్టిన భోగి జ్ఞాన యోగి//
అపరిమితములైన యజ్ఞాల వడిజేయ/
బ్రపన్నులకు బుద్ధి వచరించి/
తపముగా ఫలత్యాగము సేయించు /
కపురుల గరిమల కర్మయోగి//
అన్నిచేతలను బ్రహ్మార్పణవిధి జేయ/
మన్నించు బుద్ధులను మరుగజెప్పి/
ఉన్నతపదమున కొనరగ గరుణించు/
పన్నగశయనుడై బ్రహ్మయోగి //
తనరగ గపిలుడై దత్తాత్రేయుడై/
ఘనమైన మహిమ శ్రీవేంకటరాయుడై/
ఒనరగ సంసార యోగము గృపసేయు/
అనిమిషగతుల నభ్యాసయోగి//
(సంపుటం - 4 - 355)
తాత్పర్యం: ఆనందనిలయుడు అందరికీ గురువు! ఆ స్వామి భోగిగా ప్రకాశిస్తున్న అద్భుతమైన జ్ఞానయోగి! యజ్ఞాలే పరమార్థంగా భావిస్తున్న వాళ్లచేతనే యాగఫలాలను త్యాగం చేయిస్తున్న శ్రీవేంకటేశ్వరుడు విచిత్రమైన కర్మయోగి! సమస్త కార్యాలను బ్రహ్మార్పణ బుద్దితో చేయడం మంచిది అంటూ, అలాంటి వారిని ఉన్నత స్థానాల్లో నిలుపుతున్న బ్రహ్మయోగి శ్రీశేషశాయి శ్రీనివాసుడు! ఒకప్పుడు కపిలుడిగా, మరొక్కప్పుడు శ్రీదత్తాత్రేయస్వామిగా అవతరించిన శ్రీవేంకటేశ్వరుడు, 'సంసారం కూడా ఒక యోగం' అంటూ ప్రస్తుతం సామాన్యులను కూడ రెప్పవాల్చకుండా అనుగ్రహించడానికి అభ్యాసం చేసిన పరమయోగి ఆనందనిలయుడు!
No comments:
Post a Comment