వేమన పద్యరత్నాకరము - లోభివాని జంప లోకంబులోపల
లోభివాని జంప లోకంబులోపల
మందు పలదు వేరు మతము గలదు
పైక మడిగినంత చాల భగ్గున పడిచచ్చు
విశ్వదాభిరామ వినుర వేమ!
అర్థం: లోభిని చంపడానికి లోకంలో మందేదీ వేరే అక్కర్లేదు. డబ్బడిగితే చాలు లోభి మండి పడి చస్తాడు.
వేమన పద్యరత్నాకరము - మాటలెల్ల కల్ల మనసెల్ల దొంగయౌ
మాటలెల్ల కల్ల మనసెల్ల దొంగయౌ
నేటి ప్రాణమింక? నేటి బ్రతుకు?
మాట సత్యమైన మరి శతాయుస్యంబు
విశ్వదాభిరామ వినుర వేమ!
అర్థం: మాటలాడితే అన్నీ అబద్దాలే. మనసయితే దొంగ బుద్దే. అటువంటివాడు ఒక్క సత్యమైన పలుకు పలికితే అదే నూరేళ్ళు నిలుస్తుంది.
వేమన పద్యరత్నాకరము - కలిమినాడు నరుడు కానడు మదమున
కలిమినాడు నరుడు కానడు మదమున
లేమినాడు మొదలె లేదు పెట్ట
కలిమి లేమి లేని కాలంబు గలుగునా?
విశ్వదాభిరామ వినుర వేమ!
అర్థం: సంపద కలిగిన రోజుల్లో మదంతో సంచరిస్తాడు. ఆ రోజుల్లో ఎవరికైనా కాస్తంత పెట్టడం అనేదే ఉండదు. లేమిలోన యేమీ చేయలేడు యిక కలిమి లేములు లేని కాలం అంటూ ఉంటుందా?
వేమన పద్యరత్నాకరము - కనియు గానలేడు కదిలింపదానోరు
కనియు గానలేడు కదిలింపదానోరు
వినియు వినగలేడు విస్మయమున
సంపద గలవాని సన్నిపాతక మిది
విశ్వదాభిరామ వినుర వేమ!
అర్థం: సమాజంలో భాగ్యవంతుని దశను వేమన చమత్కారంగా యిలా చెప్తున్నాడు.
భాగ్యవంతుడు ఏదైనా సన్నివేశాన్ని చూసి కూడా నోరు మెదపకుండా చూడనట్లే ఉంటాడు. యేదైనా విన్నా కూడా విననట్లే ఉంటాడు. ఇది భాగ్యవంతుని కుండే సన్నిపాత రోగం.
వేమన పద్యరత్నాకరము - తీర్ప నార్పలేని తీర్పరితన మేల?
తీర్ప నార్పలేని తీర్పరితన మేల?
కూర్ప విప్పలేని నేర్పరేల?
పెట్టి పొయ్యలేని వట్టి బీరములేల?
విశ్వదాభిరామ వినుర వేమ!
అర్థం: ఒక సమస్యను తీర్చడానికి ఆర్చడానికి గాని సమర్దుడై ఉండాలి. తీర్పరంటే అట్టివాడు. ఒక చిక్కు వచ్చినప్పుడు దాన్ని విప్పడానికి కౌశల్యం ఉన్నవాడే నేర్పరి. పెట్టలేక పొయ్యలేక చెప్పే అసమర్దుని మాటలే కోతలు.
No comments:
Post a Comment